BAWIPA HI A ZA MAW?
Habakkuk 3:17-18
“Theipi kung cu par loin,Mitsur ruang zongah a thei um hmanh hlah seh, Oliv thing cu tlai loin Lo zongah tirawl zeihmanh chuak loin um hmanh seh, Kawm chung saṭil run kha um loin Saṭil inn ah saṭil kha um hmanh hna hlah seh law, 18 Bawipa ah cun kaa lawm ṭhiamṭhiam ko lai I A ka khamhtu Pathian cu ka lawmh ṭhiamṭhiam ko lai.”
Nu pakhat kha an pa nih I thawh riangmang in, “Nunu, Rawlchuan na thiam tuk RUANGAH kan Dawtuk,” tiah ti seh law an Nu cu aa lawm hnga maw? Nu ve zong nih an Pa kha, “Honey, na Rum tuk RUANGAH kan dawt tuk,” tiah ti ve seh law tah!
“CAAH” or “RUANGAH” Dawtnak tiah min sa usih! Hibantuk Dawtnak cu an hmailei caah Tih a nung tuk tiah, Rogers nih a chim. Hmailei pakhat le pakhat an I dawtnak caah tihnung tukmi Dawtnak asi. A donghnak ahcun, “Zeititha, dam lo nak ruangah chungkhar caah tangka ka kawl kho ti lo; ka RUM cawk tilo, Rawlthaw ka CHUAN PIAK cawk ti lo caah, a ka daw kho ve ti lo,” tiah thencheunak in an dong lai.
Pathian zonghi, “Bawipa, khuaruahhar chungkhar tha na ka pek caah kaa lawm. Nithar na ka phak ter caah kaa lawm. Thluachuah relcawk lo na ka pek caah kaa lawm,” tiah kan ti theu. Mitampi cu Bawipa hi kan cungah a tuahmi thatnak ruangah kan dawt hi a lang tawn. Asiawk zong a si ko nain! Hibantuk zumtu Nun ahcun, Pathian nih Thluachuah a pek chung hna poah amah cu an Dawt tawn. Pathian nih thluachuah pe ti lo in um hna seh law tah, zeitin! Thluachuah pe ti lo in kan um seh law tah? Bawipa hi kan Daw peng kho hnga maw?
Habakkuk nih cun ka cungah Bawipa nih a thluachuah vialte pe ti loin a ka um zongah a cungah kaa lawm thiamthiam ko lai ati. Zungzal Nunnak a kan pe I a kan khamhtu Pathian hi, vawlei thluachuah pek can ah dawt I thluachuah hmuh lo tikah Hlawt ding Pathian men asi hnga maw? Kan cung I a thatnak hi vawlei thluachuah in tah awk a tha lo. Zungzal Nunnak a si caah, Pathian hi zeibantuk thil kan ton lio caan zongah DAWT AWK AH A ZA ZUNGZAL mi Pathian asi.
Zathawngcin
Bethel Baptist Church of Texas
December 15, 2016
HTML Comment Box is loading comments...
