“That lonak a huami kha Bawipa nih a dawt hna, a mi kha a huhphenh hna I mithalo mi pawl kut chung khan a chuah hna.” Salm 97:10
Adrian nih a tialmi ca tete hi pumpak thazaang laknak ah ka rel ve theu. September 8, 2014 ah a tialmi nih ka khuaruah a tharchuah ngaingai. Cucu Khrihfa nih Huat thiam zong kan herh nak kong a si. Zumtu nih Huat thiam cawn cu tiin lau awk tlak thil asi!
Huat cawn tiah ti tiakah Khrihfa caah lau awktlak thil asi nain Khrihfa na si caah zeizong thil vialte cungah Dawtnak na ngei lai ti asi lo ati. Kan theih theu tawnmi cawnpiaknak cu Khrihfa cu dawtnak in a khatmi kan si ding asi ti asi I a hman taktak fawn. Sihmanhsehlaw Khrihfa kan si tikah Dawt lawng cawn sinloin Huat zong kan cawn I kan thiam a herh tihi kan philh lo awk asi.
Pathian na dawt ahcun, Pathian nih a huatmi thil kha NA HUAT VE A HAU I A HUA DING NA SI FAWN. Zeizawn poah hi thil sining hi a dik mi le a hmanmi asi. Pangpar a duhmi nih cun rambur sawhsawh cu huat asi. Damnak na duh ahcun Zawtnak rungrul na huat bantuk tein Pathian na dawt ahcun Thilthalo na Huat ve. Cucu a fiang ngaingai mi asi.
Rome 12:9 ah fak taktak in a kan cawnpiak mi cu, “Thil thalo kha Hua Hna,” ti asi. Minung poah le zumtu paoh nih si kan duh lo mi cu Mi Depde sihi asi. Pathian ka dawt a ti tung nain Sualnak a hua lomi hi Mi Depde hna kan sining asi theu tawn. Afapa Kut kha vailam thing cungah Thir a khenhchihtu Sualnak kha na huat tung lo ahcun Bawipa ka dawt tiah ho sin hmanhah va chim hlah, tiah Adrian nih a tialmi nih keizong ka nun hmanthlak a ka hmuhter ngaingai. Bawipa daw in Sual huami nunah thlarau nih pumpak cio kan nunnak lam kan hruai hram seh. Amen
