PATHIAN TELLO CUN KAN TLAU
Hlanlio ah Lo thlawh aa din cangmi pa John a rak um i a dawttuk mi Uico pakhat, Blue timi a ngeih. John le a Uico, Blue cu an upa veve cang i Lo rianttuannak cun an i din cang. Siseh John nih Lo le Cawrun hna cu a ngeih rih hna caah Lo ahcun Cawruun veh ahcun an kal ttheu tawn. Blue cu a tar i amit zong a tthat ti lo caah Cawruun veh awkah Lo i vakal kha a caah a har ngaingai cang. Siseh Blue cu zumhtlak Uico a si caah John nih a herh caan paoh ah zulhding ah timhcia a si peng.
Lothlo nih an chim ttheu tawnmi bia cu, " Uico cu minung hna hawi tthabik an si," ti hi a si. Zeiruang ah hi bia hi Lo thlo nih an chim hnga ti hi ruah tlaak asi. Asikhomi cu, Lo thlo hna nih an Uico he an um tti tuk caah dawtnak le tleihchannak an ngeih tuk hna caah asi lai tihi asi. John zong cu Blue hi a dawt tuk i a tleihchan tuk ve. ( Nang tah Uico na ngei ve maw? USA hna ahcun Uico an dawt tuk nak ah Uico riah nak Hotel tiang ser a si!)
Nikhat cu John le Blue cu Cawnruun khomh ding ah Lo ah an kal. John nih a cawruun pawl umnak kha Lo pa khat in pakhat ah tthial a duh hna. Blue cu a mit a Ttha tuk ti naloin John cu a tleihchan i a bawmh lengmang rih ko. Suimilam tlawmpal an rauh hnuah an rian cu an lim i Inn ah an kir.
John cu Inn a hungphak tikah Blue cu Inn a phan ti lo. John cu kha kong kha a ruah awk ah a rak thei lo. Cuticun John cu Blue nih thilhar a tong cang lai tiin a khuaruah a har.
Caan tlawmpal a rauh hnu zong ah Blue cu Inn a phan hlei ti lo. Cuticun John cu Blue kong ah a thin a phang chin lengmang cang. Rul nih maw a cuk sual hnga; rap nih a foih sual hnga maw silole zei harnak dah pakhatkhat a ton sual hnga tiin khua zaa a ruat cang.
Culecaangkaa cun John cu Blue kawl ah aa thawh. John nih cun Blue cu Thi hin hlahseh tiah thla a cam. Caan tlawmpal ah Zaangfah awktlak Blue cu John nih a va hmuh. Blue cu Lo laifang te ah kal nak thei lo in a rak to ko. A mit a tthat ti lo caah kal nak thei lo in Lo lai ah a rak to ko kha a hmuh tikah John cu Lungkuai in a um.
John nih Blue a van zoh sin ah John mifang ah Mitthli a luang. John nih Blue a mit zeitluk in dah a rak rawh cang ti kha ralrin awk ah a rak hngal lo. Hilioah Blue hi a thi lo nain A TLAU. Inn ah kirtthannak LAM a thei ti lo. Cucaah Lo Laifang ah cun a tthu i a Bawipa John nih ra in Inn kir nak lam lei ah a hruai lai kha a hngaak ko.
David Siangpahrang nih, "Tu tlau bantuk in kan vai; cucaah ra law na sal hi ka kawl tuah, zeicahtiah na phunglam cu zei rel loin ka um hna lo," tiah a ti. ( Salm 119: 176 ) Hi Bible caang hi rel tik ah John le Blue tuanbia hi mitthlam ah a cuang.
Pathian tel lo cun kan nih zong hi Blue bantuk kan si. Kan mit a caw i kan Tlau. Khuazei dah kan kal lai i zeidah kan tuah lai ti kha kan thei tawn lo. David Siangpahrang pa nih, " Pathian lo cun ka Tlau," tiah a ti lengmang. Cucaah David nih, " Ra law ka kawl, Bawipa," tiah a tinak kha si. Pathian nih Inn kir nak lam hi a sikhawh chung in a kan chimh cang. Kan sin ah a rung i langh i, "Re a theimi le thil a rit mi vialte hna, ka sin ah ra tuah u; dinhnak kha kan pek hna lai. ( Matt. 11:28;) " Bawipa kha na lung chung dihlak in i bochan law Nangmah fimnak kha i rinh hlah. Na kalnak lam kip ah amah kha hngal law Amahnih na lam kha a tluan ter hna lai. ( Phungthlukbia 3:5-6)
David Siangpahrang nih a ti rih mi cu, " Ka Bawipa cu Tukal bantuk in a ka vengtu a si, ka herh mi vialte kha a ka pek dih. Ram hring lakah a ka bawh ter, dinh hmun ti pawng ah a ka hruai. Thazang thar kha a ka pek i a rak ka kamh bantuk in a hmaanmi lam ah a ka hruai. ( Salm 23: 1-3)
Kan Nunnak ah philh lo dingmi cu : "PATHIAN TEL LO CUN KAN MAH ZONG HI KAN MIT A CAW I KAN TLAU VE," ti hi asi. Pathian auhnak aw ngai in a mah sinah kirtthan hi Pathian duhmi a si. Bawipa nih ka sinah RA U, tiah a kan auh! Kan kal lai maw?
Ch.Daily Devotional
Zathawngcin Siakhel
